Oğuz Alparslan

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Oğuz Alparslan yaradıcılığından:

"HU"

O qədər çətindir ki, tənhalığın səhəri,
Əlinlə qoyduğunu çıraqla tapmaq olmur.
Bu dağınıq otaqda xatirələr var deyə,
Heç nəyi atmaq olmur.
Bəlkə də, bu səbəbdən,
Onu unutmaq olmur.

Papiros-papirosla sevişir dayanmadan,
Dodağın papirosla öpüşür aram-aram.
Bir də ki, sərxoş halda, zümzümə dodaq altda,
təkarlanır yenə də...
"Al yazmam səndə, könlüm başqa yerdə"

Dilimdə hey dolanır adının ilk hecası,
"Hu" deyirəm Allah'a!
 ... bu şeirin ilk hecası o qədər ağırdı ki, 
Yazıb, yaratmaq olmur.
Bəlkə də bu səbəbdən, onu unutmaq olmur.

"Hu" deyirəm İlahi!
"Sufi" tək dolanıram öz sevgimin başına,
Qoy desinlər dəlidir, kədərinə oynayır.
"Hu" deyibən dolanır hey o cansız daşların,
heykəllərin başına.
"Hu" deyibən daş atır, daşların yaddaşına.

Açılmayan düyündü, boğazımda qəhərdi,
Gecələri uzundur, açılmayan səhərdi.
Bu ayrılıq acısı, ölümdən də betərdi,
Onsuz yaşamaq olmur.
"Hu" deyirəm İlahi,
Onu unutmaq  olmur.
...onu unutmaq olmur.

Dalidag.az