İqbal Nəhmət

Sevinc Qəribin təqdimatında "Bir ruh əsintisi..." rubrikasının növbəri şeir ərmağanı İqbal Nəhmət yaradıcılığından:

NƏ YAXŞI YADINA DÜŞMÜŞƏM SƏNİN...

Nə yaxşı yadına düşmüşəm sənin,
Yadına düşdüyüm yadıma gəlmir.
Daha gözləmirəm məktublarını,
Ya da göndərirsən adıma gəlmir.

Qısa rol oynadıq böyük səhnədə
Yaşanan hər şeyi tamaşa bildik,
Bəxti gətirməyən sarmaşıq kimi,
Biz ancaq tikana dolaşa bildik,

Əcəb yolun tapdıq nəfəs almağın,
Gör nələr boğuldu nəfəsimizdə.
Dünəni yaşaya bilmədik heyif,
Sabaha qalmadı həvəsimiz də.

Nə yaxşı yadına düşmüşəm sənin
Nə əcəb bir anım ilişib səndə.
Mənə xatirələr bəs eləmişdi,
İndi nə olacaq biz görüşəndə.

Yadına düşmüşəm sevindim buna,
Bir az da üzüldüm çox yubanmısan.
Bizim tüstümüzü görən olmayıb,
Mən burda, sən isə orda yanmısan.

Dalidag.az