Qədiməli Əhməd

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Qədiməli Əhməd yaradıcılığından:

TƏNHA SEYR EDİRƏM...

Bir qərib gecə var bu yad şəhərdə, 
Yaddaşa köçəcək bilməm nələrlə?   
Saatlar səssizcə əriyib gedir, 
Durmuşam üz-üzə xatirələrlə. 

Bu qərib şəhərdə bir müsafirəm, 
Çəkir gözlərimi hər künc, hər bucaq. 
Səndən uzaqlarda bir həmdəmim yox, 
Mənim həsrətimi kim oxuyacaq?

Burda göy üzündə bir parça bulud, 
Yerlə əsib keçən külək soyuqdu. 
Bir də gözlərimin gizli sirrinə 
Hər gün vaqif olan ürək duyuqdu. 

Bu qərib gecənin sükutu dərin, 
Çıxmağa nə yol var, getməyə zaman...
Hər şey bildiyimtək deyil, bəlkə də, 
Bəlkə yad şəhərdə üzə gülmür dan?

Üstümdə göy üzü, dikilib baxır,
Pəncərəm önündə sirlidi gecə. 
Ulduzlar sürüşür, ulduzlar axır,
Tənha seyr edirəm baxıb beləcə...

Dalidag.az