Səadət Cahangir

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Səadət Cahangir yaradıcılığından:

***
Bir sabah 
dan yeri ağarmadan
bütün yorğunların yerinə oyanın,
bir fincan süd qoyun qapıya, 
anasını azmış pişik balası var,
anası dönüncə ac qalar…

bir az alatoranlığın səssizliyində 
dayanın işıqlar yanmamış,
bir ovuc çörək səpin oyaq göyərçinlərə 
şəhər oyanmamış…

səhər açılmamış
dolu qarderobları açın sıra-sıra 
köhnə geyimlərin cibindən 
boş ümidləri çırpın getsin bayıra…

gözəl mahnılar dinləyin 
küyçü radiolar başlamamış
birağızdan,
sahilə enin 
dənizçilər yola çıxmamış,
bir dilək qayığı buraxın 
sulara ağ kağızdan…

bir şeir oxuyun,
bir şeir- uzaq arzulara yazılmış olsun,
cavab məktubu qocaman bir ümid tək
qoca poçtalyonun 
unutqanlığına qalmış olsun…

bir sabah 
bütün yorğunların yerinə oyanın
dan yeri ağarmadan,
sizdən olsun o gözəl gün,
buraxın yuxuya qalsın
neçə yorğun adam…

Dalidag.az