Hədiyyə Şəfaqət

Sevinc Qəribin təqdimatında "Bir tuh əsintisi..." rubrikasının növbəti şeir ərmağanı Hədiyyə Şəfaqət yaradıcılığından:

***
harda intizar var,
harda səma var
harda buludların boz dərinliyi
harda bir qadının çiyinlərində
ən gizli sirlərin öz dərinliyi...
 
əllərin uzana bilmədiyi yer,
gözlərin boylana bilmədiyi yer,
kişi ürəyinin döyüntüsündən
sözlərin boylana bilmədiyi yer...
 
məhəbbət xəyaldır,
həqiqət boğuq
dənizin sinəsi ölüm daşıyır
bizə elə gəlir şəhərlər evdir,
şəhərlər qapıdır, karvan qapısı
qocalar köç edir, Allah yaşıyır...
 
dayanır, baxmayır kim keçib gedir,
dayanır, eşitmir duaları da
özü hər yerdədir
ruhu bax burda,
bax burda: çiçəklər içən sularda...
 
kiçik bir yarpağın saplağındakı
qopmaq qorxusudur Allahın ruhu
böyük bir qayanın çatlağındakı
qarmaq qorxusudur Allahın ruhu...
 
mən onu tutmuşam ovuclarımda
dünyadan keçmişəm övuclarımda
Allahın quşların uçuşundakı
ruhunu içmişəm ovuclarımdan...
 
harda intizar var,
harda səma var
bir vərəq yazı var, bir qara qələm
qadın çiynindəki sirr nöqtəsində
unut şəhərləri,
mən o nöqtəyəm...

Dalidag.az