Mirbagir Bunyatov 

Sevinc Qərbin təqdimatında "Bir ruh əsintisi..." rubrikasının növbəti şeir ərmağanı Mirbagir Bunyatov yaradıcılığından: 

* * *
Bircə günlük geri qaytar yanımda,
Atam olsun, əmim olsun, İlahi!
Səndən dəniz istəmirəm, bilirsən,
Ağ kağızdan " gəmi " m olsun, İlahi!

Sevgi olmaz kimsə səndən qorxdusa.
Dua deyil dilimizdən çıxdısa..
Uçurmağa bir göyüzü yoxdusa,
Çərpələnglər sənin olsun, İlahi!

Yaz sinəmi, sinəm üstü dolunca.
Ətri uçar bu çiçəkdən solunca..
Mənim kimi min alçağın olunca,
Bir Məhəmməd Əmin olsun, İlahi!

Ömür yuxu, düzgün yoza bilmədim.
Könül verdim bir arsıza, bilmədim..
Haqq istədim, haqqı yaza bilmədim,
Qələm mənə qənim olsun, İlahi!

Qara günüm, gəldin, üzün ağ olsun.
Altı çiçək, sinən üstü dağ olsun!
Mən ölürəm, təki başın sağ olsun,
Axırıncı qəmin olsun, İlahi.

Dalidag.az