Yusif Hüseyn

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Yusif Hüseyn yaradıcılığından:

DAŞA DÖNDÜK, BU SEVDANIN BAŞINDA...

Bu məhəbbət nə çətinmiş, nə ağır,
Bu talehdən bəxtimizə daş yağır.
Bu sevgidə nə əvvəl var, nə axır,
Sən baharda...mənsə ömrün qışında,
Daşa döndük, bu sevdanın başında...

Daş ürəyin sevgisi də daş olar,
Daş ürəkdə bahar olmaz, qış olar,
Qismət bəzən əl çatmayan quş olar.
Deyirlər ki, sevdası var quşun da,
Daşa döndük bu sevdanın başında...

Çox sevgidən çox bəxtəvər yarıdı,
Yarımayan bizim kimi qarıdı,
Ömür ki var, məhəbbətlə yarıdı.
Dəniz varmış gözümüzün yaşında,
Daşa döndük bu sevdanın başında...

Mən ağılsız, daş ürəkdən pay umdum,
Sevgi umdum, haray umdum, hay umdum,
Sən bahardan qış ömrümə yay umdum.
Deyərdilər, qisməti var daşın da,
Daşa döndük bu sevdanın başında...

Mən bu dağda, sən o dağda gülüydün,
Çiçək kimi çəmənlərlə biriydin,
Yusif üçün oba idin, eliydin.
Harda qaldın, ömrün yarı yaşında?!
Daşa döndük, bu sevdanın başında...

Dalidag.az