Pərvin Əliyeva

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Pərvin Əliyeva yaradıcılığından:

* * *
Yaşadığımız bihal yuxulardı.
Yuxular səmada, yuxular qatarda, yuxular 
Təqib edir hər yerdə.
Üç dünyadan ibarətdir bu dünya;
Yuxu, yazı, yozum.

Yüksəkliyə haradan baxırsansa,
Başlayır oradan həyat .
Ləyaqət nədən başlayırsa,
Həqiqətin taleyi də ora qədərdi.

Qələbə bəzən saxta təsəvvür oyadır 
Daş -qalaqlı bəzəyə çevrilir.
İstedad mütləq maneə olacaqdır xoşbəxtliyə..
Düşünməyi unudanlar xoşbəxt olacaq, bəlkə,
Kim bilir.

Bu dünya bir səhra metaforasıdır,
Burada yuxulayanlar, yuxudan oyananlar var.
Qum üstündə tikilmiş ev kimi qəlblər
Uçulur, dağılır, xəyal epizodunda.

Bu kədəri, bu qüruru, bu fərqi görürsən?!
"Dahi və dövran"da var, nə varsa,
İndi bir işarə kimidir gördüyüm hər şey
Ölüm də müvazi verilir.

Yanğılı laylalardan gözüyumulu gəldik,
Sual və qayğılardan 
Gözü açıq gedəcəyik deyəsən. 
Bircə bir uşaq nağılı,
Bircə nağıllar inandırıcı gəlir mənə.
Bir də analarımızın yuxuya verən laylaları.

Dalidag.az