Nazim Əhmədli

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Nazim Əhmədli yaradıcılığından:

DEYƏN TANRI DA OYAQDI
 
Hərdən qayıdır canıma,
bir sınıq agrı, gecələr;
ulduzlar göydən perikib,
hayana axır, gecələr;

sorağı gəlmir, eləmir,
ruhum səs-səmir eləmir;
gözlərim çimir eləmir,
könlüm darıxır, gecələr;

qaçdım, ağrının küründən,
yıxıldım, dərdin birindən;
yuxumun bulud yerindən,
elə qar yağır, gecələr;

kimsə məni qaralıyıb,
dağ başında qar allıyıb;
göy üzünü aralıyıb,
fələklər baxır, gecələr;

yaddaşım, yadım daş kimi,
dərdi boyadım, daş kimi;
görsən ki, yatdım, daş kimi,
gəl, məni çağır, gecələr;

buludlar papaq-papaqdı,
göydən yenə ulduz axdı;
deyən,Tanrı da oyaqdı,
bu son, bu axır gecələr.

Dalidag.az