Rafiq ODAY

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Rafiq ODAY yaradıcılığından:

DÖNÜŞDÜ

Qərib ruhlar köç üstündə - yol uzun,
Haqqa gedən yol qürbətə dönüşdü.
Varacağı bir yer varmı yolsuzun? -
Qucaq açan qol qürbətə dönüşdü.

Göz səmada, dil duada, qəlb aram,
Bir qətrə də qəbul etməz qəlb haram.
Səma hara, bulud hara - qəlp hara?! -
Çəmən, çayır, kol qürbətə dönüşdü.

Eşq tükənsə, sevda sızlar içində,
Əriyərsən sevdasızlar içində.
Adın vardı beş-üç azlar içində,
Sağ susduqca, sol qürbətə dönüşdü.

Bəxtəvər qul sonda haqqa varanmış,
Duz səpdiyin demə özcə yaranmış.
Külli-aləm bir kəlmədən  yaranmış, - 
Dönük çıxdıq, "Ol!" qürbətə dönüşdü.

Dalidag.az