Saqif Qaratorpaq

Sevinc Qəribin təqdimatında "Bir ruh əsintisi..." rubrikasında növbəri şeir ərmağanı Saqif Qaratorpaq yaradıcılığından:

* * *
Sınadım, sınıq çıxdı, çox heyif "can" deyənlər,
Eh...ürək qızdırmağa bir adam da qalmadı.
Neyləsin bu qürbətdə bəs indi pərvanələr,
Başına dolanmağa bircə şam da qalmadı.

Bitdi kəpənək ömrü arzumun, həvəsimin,
Gizlicə dəfn elədim ürəyimin başında.
Əllərimi gül kimi qoydum üstünə hərdən,
Bəlkə bir gün göyərdi-gözlərimin yaşından...

Sonra yığdım tozunu, xatirətək saxladım,
Misra-misra dirildi barmağımın ucunda.
Ürəyim puçurladı hər gələn yaza doğru,
Hər gecə su içdikcə ayrılığın ovcundan.

Elə sındı içimdə şüşə-şüşə ümidlər,
Qırıq-qırıq nəğməsi heç dodağa çatmadı.
Nə vaxtdı başlamışam şeir-şeir ölməyə,
Bəlkə elə söz ömrüm son varağa çatmadı.

Dalidag.az