Nazilə Gültac

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Nazilə Gültac yaradıcılığından:

ÖLMƏYİB HƏLƏ
 
Gözümü buluddan çəkə bilmirəm,
Ömrün səmasına yağışlar yağır.
Könül gülşənimi gəzə bilmirəm,
Qəlbimin bağına yarpaqlar yağır.
 
İçimdə arzular boylanır qəmli,
Bir sevda nəğməsi oxuyur bəmli,
Çoxdandır gülməyi yadırğayıbdır,
Gülən gözlərimin baxışı nəmli.
 
Bilirəm, ağlında mən varam hələ,
Gördüyüm yuxular söyləyir mənə.
Göylərdə ulduza, dağlarda çənə,
Üz tutan xəyallar ölməyib hələ.
 
Gültacın taleyi qışdı, ayazdı.
Həyat sarı simə köklənən sazdı.
Bircə təsəllim var qoca dünyada,
Bahara can atan qar da bəyazdı.

Dalidag.az