Əbülfət Mədətoğlu

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Əbülfət Mədətoğlu yaradıcılığından:

Sevgi xərtəsi

Yaman sürətlənib, çatdırmaq  olmur, 
Vaxtın tozqoparan fəsilidi bu...
Üzü  köçürülmür, rəngi də solmur - 
Çünki, gerçəkliyin tam əslidi bu!..

Şütüyür xəyal da, qaçır ayaq da  
Amma heç qısalmır gözün mənzili...
Fikir də, qələm də hər an ayaqda - 
Dildən dodağadı sözün mənzili!..

Sinəmin üstündə qol budaqlanır,  
Uzanan əl ancaq şəkilə çatır... 
Keçir sərhədləri yol budaqlanır - 
Mənimlə gecələr bir şəkil yatır!..

...Nəfəsim təngiyən vaxtın ardınca  
Yanaşı gedirik iki kölgə tək... 
Sevgi xərtəsində, bizi latınca -
Yazıblar, ay gülüm, vahid ölkə tək!

Dalidag.az