Çiçək Tağıyeva

Sevinc Qəribin təqdimatında "Bir ruh əsintisi..." rubrikasında növbəti şeir ərmağanı qürbətdə yaşayan Çiçək Tağıyeva  yaradıcılığından: 

GƏL QAYIDAQ O İLLƏRƏ, ƏZİZİM

Könül açar tər güllərin nəfəsi, 
Bülbüllərin cuşa gələr həvəsi. 
Yaddan çıxmaz ilk görüşün vədəsi,
Gəl qayıdaq o illərə, əzizim! 
 
Ömür keçər asta-asta, gunbəgün, 
İlk məhəbbət ürəklərdə bir düyün. 
Bir arzu var ürəyimdə, qoy deyim -  
Gəl qayıdaq o illərə, əzizim! 

Gözlər görməz öz yaşını yanaqda, 
Həsrət üzər çiçəkləri budaqda. 
Vida sözü alışmamış dodaqda, 
Gəl qayıdaq o illərə, əzizim! 

Ay işığı göy üzündən süzülsün, 
Xatirələr ləçək-ləçək düzülsün. 
Ötən günlər şirin-şirin çözülsün,
Gəl qayıdaq o illərə, əzizim!

Dalidag.az