Vüsal Yurdoğlu

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Vüsal Yurdoğlu yaradıcılığından:

* * *
Daşın üstündə var yoxdur,
Nə var,
var daşın altında.
Daşın altında yox yoxdur
Kİ, var var daşın altında.

Daşı qaldır, gəzmək üçün,
Var olanı sezmək üçün.
Sonsuzluğa üzmək üçün
Avar var daşın altında.

Həm ədalət, həm də sehir,
Həm məhəbbət, həm də mehir,
Aradığın ləl-cəvahir,
Zivər var daşın altında.

Davam elə kef-damağa,
Gərək yoxdur ağlamağa.
O dünyaya adlamağa
Divar var daşın altında.

Daşın altı usta.., usta
Sirr saxlayar usta-usta.
Adamları asta-asta,
Ovar var daşın altında.

Kim ki yeri döndərəcək,
Daşı tərsə çöndürəcək.
Yanğını tez söndürəcək,
Su var,
var daşın altında.

Yurdoğlu, nəydi yandığın?!
Kimdir həqiqət sandığın?!
Varlığına inandığın
Bu var, var daşın altında.

Dalidag.az