Mirzəcan Ağabalayev

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Mirzəcan Ağabalayev yaradıcılığından:

***
Darıxsan, qorxma,
Bir az çevir üzünü,
Bir az süzdür gözünü.
Məzələn dərdlə,
əylən, kef çək həsrətlə.
Məsələn, de ki, gedirəm sevgilərə...
Boylanıb uzaqlara ah çəkmə amma.

Darıxsan,
Dərdi çətir kimi tut başın üstə,
Payız gülüşündən özünü qoru.
Dərddən darmacalda sığıncaq istə,
Qəfil bir görüşdən özünü qoru.
Unutma,bir vaxt 
güzgü tutduğumuz yollara, 
dalana, tinə,
Həsrətdən hörülmüş dərdbənd qoyulub, 
Şeirlər yazılıb, sözlər qoşulub.
(Unutma, şeir də sevgi kimidi,
cilası solmayan güzgü kimidi.) 

Unutma, indi də bu küçələrdən, 
Yollardan güzgülü sevgilər keçir.
Müzey əşyası kimi,
Sevgi sovxası kimi,
Baxıb həsrətdən hörülmüş sevgi şeirlərinə,
Təbəssümlə süzürlər bir-birini.

Darıxma, həsrətin kür balası,
Darıxsan, qorxma, zəng elə,
Çağır savaşa- cəng eylə.
Bilirsən, bir qərinədir burdayam, 
Mən-dərdin hürr balası.

Dalidag.az