Şahnaz Şahin 

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Şahnaz Şahin yaradıcılığından:

ŞƏKİL ÇƏKİRƏM

Mən də bir cürə şairəm.
“Ah”la şəkil çəkirəm.
İnanmırsan gəl otur
Yoxla, şəkil çəkirəm..

Qoy qırağa kətanı,
Gey ruhuna butanı.
Ağrıyanda sağ yanım,
“Sol”la şəkil çəkirəm.

Bir az rəng qoy saçına,
Həmrəng olsun acına.
Bir söz qoy bəxt ucuna
Yolla, şəkil çəkirəm…

Hər yazılan söz deyil,
Hər görənə göz deyəm!..
Min üzü var dözməyin
Allah, şəkil çəkirəm…

Çıx işıqlı talaya,
Bax o müdrik qalaya.
Öd yalaya-yalaya
Odla şəkil çəkirəm!

Buraxdım qəmi getdi,
Azadlıq dəmi getdi..
Ürəyim məni satdı…
Baxma şəkil çəkirəm…

Dalidag.az