Aybəniz Əliyar

Sevinc Qəribin təqdimatında "Bir ruh əsintisi..." rubrikasının bu dəfəki şeir ərmağanı Aybəniz Əliyar yaradıcılığından: 

***
Sevməyə yaşımız çatdımı görən?
Ürək harda durdu, harada dindi?
Mən uşaq dalıyca, sən ev dalıyca,
Kimin qayğısına qalırıq indi?

Kimin ocağına odunuq görən?
Kimin çatısına yamağıq axı?
Tanrıdan tək bir şey istəyirəm mən,
Özümü itirib səni tapmağı...

Sevməyə yaşımız çatdımı görən?
Bu yaş necə yaşdır, de, hardan bilək?
Bəlkə yaş dalıyca, quru dalıyca
Boş-boş yollanmaqdan yoruldu ürək?

Deyir, yetimin də Allahı varmış,
Səni məndən alan niyə qorumur?
"Qurunun oduna yaş da yanarmış",
Mənim yaş gözlərim niyə qurumur?

Sevməyə yaşımız çatdımı görən?
Bu sual önündə illər göz döyür,
Sənin ağ saçların "çatdı" deyirsə,
Mənim ağ saçlarım "keçibdir" deyir.

Dalidag.az