Yeni il gələr-gəlməz bədbəxt hadisəylə qarşılaşanlardan biri də kəlbəcərli məcburi köçkün Gülxanım Kərimova olub.

Məcburi köçkünün Mingəçevirdə müvəqqəti məskunlaşdığı yataqxana otağı qısaqapanma nəticəsində əşyaları ilə birlikdə yanıb kül olub. Qəpik-qəpik yığdığı müəyyən məbləğdə pul da həmçinin. Hadisədən sonra zərərçəkən aidiyyəti orqanlara- Kəlbəcər rayon  İcra Hakimiyyəti və hal-hazırda məskunlaşdığı Mingəçevir şəhər İcra Hakimiyyətinə müraciət etməsinə baxmayaraq, şikayəti nəticəsiz qalıb.
Dalidag.az-ın məlumatına görə 123 saylı Kəlbəcər Seçki Dairəsi üzrə  deputatlığa namizəd, tanınmış vəkil Əziz Qənbərov baş vermiş hadisə ilə əlaqədar xanımı ziyarət edib. Qohumunun evində sığınacaq tapmış məcburi köçkün vəziyyətinin ağır olduğunu, küçələrdə qaldığını və şikayətinə baxılmadığını bildirib. Məsələ ilə yaxından tanış olan vəkil hadisəni ictimailəşdirib. Bundan sonra, G. Kərimovanın evi təmir olunub. Ancaq buna baxmayaraq o hələ də  küçələrdədi. Ev heç bir əşya ilə təmin olunmayıb, yaşamaq üçün yararsızdı.

Ümid edirik ki, aidiyyəti orqanlar üzərinə düşən vəzifəni yerinə yetirərək, onsuz da yurd həsrətilə ürəyi yanan bu xanıma köməklik göstərəcək, evinin əşya ilə təmin olunmasına şərait yaradacaqlar.

Dalidag.az