Yerli saytlarda Sabiq Daxili İşlər naziri İsgəndər Həmidovun öldüyü barədə xəbərlər yayılıb.
Dalidag.az xəbər verir ki, həqiqəti əks etdirməyən bu cür yalan xəbərlər onsuzda ağır günlər keçirən İ.Həmidovun ailəsində narahatlıqlar yaradıb. Keçmiş nazirin bacısı oğlu Şəhriyar Məcidzadə xəbəri təkzib edərək bildirib ki, İ.Həmidovun vəziyyəti ağır olsa da sağdır.
Ş.Məcidzadə hamıdan yalnız və yalnız ailənin verdiyi xəbərlərə istinad etmələrini xahiş edib:

"Etika gözləyirik olmur. İnsanlıq gözləyirik olmur. Yalandan xəbər verirlər ki, İsgəndər Həmidov vəfat edib. İnsanlar narahat olur, yaxınlarına ailə üzvlərinə zəng edib eşitmək istəmədiyimiz acı xəbəri soruşurlar. Acımızı yenidən yaşayırıq. Telefon xətlərində göz yaşlarına hakim ola bilməyən bu adamlara yazıq deyilmi? Adam öz insanının, öz xalqının nümayəndəsinin ağrısına, acısına dəfələrlə səbəbsiz yerə səbəb olmaq istəyərmi? Bir dəfə xəbər yayanları adını qeyd etmədik. Amma olmadıda! İsgəndər Həmidovun vəziyyəti kəskin ağırdır. Amma sağdır. Xahiş edirik, hörmətli media mənsubları, vətəndaşlar, İsgəndər Həmidovun haqqında olan xəbərləri ailə üzvlərinə istinadən veriləndə əhəmiyyət verəsiniz. Bu yalançı, bu saxtakar adamların verdiyi, Həmidovlar ailəsinə heç bir aidiyyatı olmayan adamların xəbərlərinə əhəmiyyət verməyəsiniz. Kim bu yalan xəbərləri verirsə, onları da bura tag edin görək hardan alırlar bu xəbəri, kimə istinadən insanları dəfələrlə ağır duruma salırlar? Məqsədləri nədir? "
Qeyd edək ki, İ.Həmidov 24 yanvardan komadadır və süni tənəffüs aparatına qoşulub.

Dalidag.az