"...Yaman ləngimişik, gəl çıxaq gedək,
Dağlar əbədilik küsdü, Əlövsət!.."
Dalidag.az  Azərbaycan Yazıçılar Birliyinin Moskva bölməsinin katibi, tanınmış şair Nəsib Nəbioğlunun "Azərnəşr"in baş redaktoru, keçmiş millət vəkili, əməkdar jurnalist Əlövsət  Ağalarova ünvanladığı həsrət yüklü, göynək şeirini təqdim edir:  

ƏLÖVSƏT

Gözümdə min şəhid qanıdı dünya, 
Əzəldən bilirəm fanidi dünya,
Bizi yazıq görüb tanıdı dünya,
Xıncım-xıncım etdi, kəsdi, Əlövsət!

Dərdinə şahiddi günəş də, ay da,
Özün bu tərəfdə, qəlbin o tayda,
Murovun başında Kəlbəcər boyda,
O  rüzgar hayandan əsdi, Əlövsət?  

Gəl köhnə dərdimi gözə ahına,
Bir ağı deyimmi təzə ahına?
Ürəyim qalmadı dözə ahına,
Bu necə nalədi, səsdi, Əlövsət!

Xəyal pərvazlandı, quş oldu belə,
Yoxsa ürəyimiz daş oldu belə?
Ömrümüz  nağıla qoşuldu belə,
Nağıllara uyduq, bəsdi, Əlövsət!

De harda haqsızıq, harda haqlıyıq?
Biz ki, yaranandan haqqa bağlıyıq,
Gör neşə ildir ki, sinədağlıyıq,
Yolumuz dumandı, sisdi, Əlövsət!

Qəmli könlümüzü ovudaq  gedək,
Keçilməz sədləri dağıdaq, gedək,
Yaman ləngimişik, gəl çıxaq gedək,
Dağlar əbədilik küsdü, Əlövsət!

Nəsib Nəbioğlu
Dalidag.az