“Torpaqlarımızın yağı tərəfindən yağmalanması, neçə illər Novruz bayramını ürəyimizcə keçirməyə imkan vermədi”

 Bu sətirlər “Çovdar və Şahkərəm” Cəmiyyəti üzvlərinin Novruz bayramı münasibətilə  Dalidag.az-ın elektron poçtuna göndərdikləri təbrik məktubundandır.

"Hörmətli Kəlbəcərlilərimiz!
Sizi, Sizin timsalınızda Azərbaycan xalqını Novruz bayramı münasibətilə ürəkdən təbrik edir, ən xoş arzularımızı çatdırırıq.
Mənəvi dünymızı zənginləşdirən Novruz bayramı milli birliyimizin rəmzidi.
Qədim tarixi olan, türk-müsalman dünyasında qeyd edilən bu bayramın gəlişi hər evdə, hər ailədə xoş  əhvali-ruhiyyə yaradır, insanlara yeni stimul verir.

Artıq yazın nəfəsi, baharın ətri, duyulmaqdadır. Baharın gəlişi, təbiətin canlanması, torpağın oyanışı insanlara xoş bir müjdədir...
Yetmiş ildən artıq sovet ideologiyası Novruz  bayramını keçirməyə müəyyən qadağalar qoysa da, xalqımızın qan yaddaşından silə bilmədi. Xalqımız ən çətin dövrlərdə ənənə və dəyərlərini, milli bayramlarını yaşatmağı bacardı. Və bu günə - Müstəqillik dövrünə gətirib çatdırdı.

Torpaqlarımızın yağı tərəfindən yağmalanması isə, neçə illər Novruz bayramını ürəyimizcə keçirməyə imkan vermədi. Həyət-bacamızda çərşənbə tonqallarını yandırmaqdan çəkindik, bir çox hallarda isə, həm də utandıq. Artıq azad olunan yurd yerlərimizdə çərşənbə tonqalları çatılır, torpağın yaz nəfəsinə çərşənbə tonqallarının istisi qatılır.Yurd ağrımıza, bənövşə həsrətimizə son qoyuldu. 

Xalqımızın gözəl bayramı olan Novruz münasibətilə sizi təbrik edir, xoş gələcək, əmin-amanlıq, bol ruzi, bərəkət, arzulayırıq. Baharın gəlişi hər bir ailəyə səadət, xoşbəxtlik gətirsin", - deyə təbrik məktubunda bildirilir.

Dalidag.az