Dalidag.az İslam Türkayın rəhmətlik Bəhmən Vətənoğlunun sağlığında "Ömrü eləmişəm yarı, bəs hanı?"şerini dinlədikdən sonra böyük şairə   yazdığı məktubu təqdim edir:

BƏHMƏN VƏTƏNOĞLUNA

O dağlarda gileylənmə, amandı,
Səsin gəlib bizə çatdı, qardaşım.
Bu da belə bir dövrdü, zamandı,
Buralarda çathaçatdı , qardaşım.

Orda sənin şerin, sözün yaralı
Burda mənim rəngim-rufum saralı.
O dağlarda qeybətlərdən aralı
Kef-damaqdı, toy-busatdı, qardaşım.

Köçüm getdi o durnanın köçündə,
Meylim yoxdu dövlətində, heçində...
O güllərin, çiçəklərin içində
Könül toxdu, can rahatdı ,qardaşım.

Burda yolu bağlı qalıb filin də ,
Orda ceyran qayaların belində...
Burda ömür saatların əlində,
Orda ötən vaxt azaddı , qardaşım.

Yaddan çıxar orda qəm də, qəhər də,
O dağlarda bal dadıyar zəhər də.
Qəbirə də bashabasdı şəhərdə,
Orda şükür, iş babatdı, qardaşım.

Deyirsən ki “ömür yarı, bəs hanı?..”
Kim qazandı o şöhrəti, o şanı?
Kim sıyrıla, kim qınında paslanı,--
Bilmək olmaz, bu həyatdı, qardaşım.

Bu dəryadı, burulğandı,axındı,
Hünərin var, bu axında ax indi.
O dağlarda Tanrı sənə yaxındı,
Orda ölmək mükafatdı, qardaşım..

İslam Türkay
Dalidag.az