Faiq Hüseynbəyli

Sevinc Qəribin təqdimatında "Bir ruh əsintisi..." rubrikasının növbəti şeir ərmağanı Faiq Hüseynbəyli yaradıcılığından:

* * * 
Nə deyib bağlanar insan insana,
Nə deyib gözündə yaşlara dönər?
Darıxan sözləri gətirər cana,
Yollara, çaylara, daşlara dönər? 

Nə deyib şəkillər danışar səni,
Küləklər ətrini gətirər hər gün.
Bu zalım təbiət, amansız zaman,
Səni uzaqlara götürər hər gün. 

Yüz il yağış yağa, söndürə bilməz,
Sinəmin üstündə közdü həsrətin.
"Qorxuram, bir daha səni görməyim",
Yollardan yığılan gözdü həsrətin. 

Səni hicran-hicran itirirəm mən,
Qayıtsan, qışda da çiçəklər açar.
Özümün sonunu gətirirəm mən,
Ürəyim dost kimi, ürəyim haça. 

Asta get, gedişin yol əmanəti,
İzini boyuna biçir yolların.
Milyon il keçsə də qayıdacaqsan,
Mənim ürəyimdən keçir yolların. 

Dalidag.az