Sevil Gül Nur

Sevinc Qəribin təqdimatında "Bir ruh əsinrisi..." rubrikasının növbəti şeir ərmağanı Sevil Gül Nur yaradıcılığlndan:

YOXLUĞUNLA SAVAŞMAQ

Ayrılıq içir qanımı,
Ruhumun gücü azalır.
Həsrətin dar ağacından
Hər gün bir ümid asılır.

Ürəyim də üz çevirib,
Bir dəfə üzümə baxmır.
İnadım dözüb dayanır,
Hisslərim sözümə baxmır.

Savaşdayam yoxluğunla,
Dadıma şeirlər çatır.
Qətl edirəm hisslərimi,
Əllərim qanıma batır.

Qürurum sıldırım qaya,
Qarşında əyə bilmirəm.
Gedəndə yolu kəsmədim,
İndi "dön" deyə bilmirəm.

Harayım sənə çatsaydı,
Bəlkə də çox söz deyərdim.
Dönəcəyini bilsəydim,
Milyon il də gözləyərdim.

Sən atlı, mənsə piyada,
Ha qaçdım, çata bilmədim.
Söz vermişdim unutmağa,
Sözümü tuta bilmədim...

Dalidag.az