Əslən Kəlbəcərdən olan tanınmış jurnalist, Koordinat.az saytının baş redaktoru Elxan Salahova ağır itki üz verib.
Dalidag.az xəbər verir ki, jurnalistin anası Tavat xanım dünyasını dəyişib. Sinəsi bala dağlı, yurd həsrətli, torpaq nisgilli bir ana köçdü dünyadan. Kəlbəcərə, Başlıbelə qovuşmadan...Kəlbəcər göynəyini, oğul dərdinə büküb, ağrılarını torpağa pay apardı.
Allah rəhmət eləsin!
Xatırladaq ki, Başlıbel seyid şəcərəsinin davamçısı Seyid Tavat Seyid Məhəmməd qızı həm də şəhid Elşad Salahovun anasıdır. Qəhrəman şəhidimiz Kəlbəcər qış əməliyyatı zamanı Murovdağda həlak olub. Ruhu şad olsun!
Yaxınlarının verdiyi məlumata görə, mərhumənin 3 mərasimi 19 fevralda Bərdə rayonunun İmamqulubəyli kəndində keçiriləcək.

Qeyd edək ki, Elxan Salahov 1993-cü ildə Kəlbəcər rayonunun işğalı zamanı 36 sakinin amansızcasına qətlə yetirildiyi, 19 nəfərin girov götürüldüyü, 1 nəfərin (İkinci Dünya müharibəsi əlili, 75 yaşlı Kazımov Ələsgər Ələsgər oğlu) itkin düşdüyü Başlıbel faciəsini əks etdirən, yurd-yuvasını tərk etməyən, 3 aydan artıq kahalara sığınmış 76 nəfər Başlıbel sakininin mühasirə həyatından bəhs edən "Qanlı kaha" kitabının müəllifidir.

Dalidag.az