Doğma Kəlbəcərimizin öz ziyalıları ilə taninan, ən böyük yaşayış məntəqəsi olan Başlıbel kəndi doğma Azərbaycanımıza neçə-neçə alimlər, ziyalılar bəxş etmişdir. Bu ziyalıların yetişməsində Başlıbel kənd orta məktəbində işləmiş bütün müəllimlərin böyük zəhməti olmuşdur. Vaxtı ilə Başlıbel kənd orta məktəbində verilən təhsilin yüksək səviyyədə olması öz sübutunu dəfələrlə tapmışdır. Burada işləyən hər bir müəllimin pedaqoji fəaliyyəti digər məktəblərdəki müəllimlər üçün nümunə çəkilərdi. Bu gün həmin məktəbin təqaüddə olan müəllimi Əhəd Məmmədovla sizi tanış etmək istəyirik.
Gözümü dünyaya açandan həm evimizdə, həm də ətraf qonşularımızda, eləcə də bütün kəndimizdə elmə, təhsilə, eləcə də təhsil verən müəllimlərə böyük hörmət və ehtiram görmüşəm. Kəndimizdəki məktəbdə dərs deyən müəllimlər haqqında həmişə hörmətlə danışardılar. Kəndimizdə elə bir ev yox idi ki, oradan heç olmasa bir ali və ya orta ixtisas təhsilli adam çıxmasın. Bunun da səbəbi Başlıbel kənd orta məktəbində işləyən müəllimlərin düzgün təhsil verməsində idi. Bu məktəbin müəllimləri yüksək səviyyədə ali təhsil almış və öz ömürlərini gənc nəslin təlim- tərbiyəsi və  təhsili yolunda fəda etməyə hazır olan əsl təhsil fədailəri idi. Oxuduğum məktəbdə mənə ana dilimizin şirinliyini və incəliyini, ədəbiyyatəmızın tarixini, nəzəriyyəsini və incilərini öyrədən Əhəd müəllim haqqında bizdən böyük olan şagirdlər, eləcə də məktəbimizin məzunlarından həmişə xoş sözlər eşidirdik.
Hamı onu həm öz peşəsini sevən savadlı və bilikli müəllim, həm də şagirdlərinin biliyini obyektiv qiymətləndirən ədalətli müəllim kimi tanıyırdı. Onun haqqında danışırdılar ki, Əhəd müəllimdən Başlıbel kənd orta məktəbində  “4” alan şagird ali məktəbə qəbul imtahanında da “4” alır. Bu, onun son dərəcə obyektiv olmasından xəbər verirdi. Məmmədov Əhəd Cəfər oğlu 1939-cu ildə Kəlbəcər rayonunun Başlıbel kəndində anadan olmuşdur. 1948-ci ildə Başlıbel kənd yeddi illik məktbin birinci sinfinə daxil olub 1955-ci ildə həmin məktəbin yeddinci sinfini bitirmişdir. Həmin illərdə Başlıbel kəndində orta məktəb olmadığından səkkizinci, doqquzuncu və onuncu sinifləri qonşu Ağcakənd kənd orta məktəbində oxumuşdur. 1959-cu ildə Azərbaycan Pedaqoji İnstiturtunun ibtidai təhsilin metodikası və pedaqokikası fakültəsinə daxil olmuş və 1963-cü ildə həmin fakültəni bitirib sinif müəllimi ixtisasına yiyələnmişdir. Beş il Başlıbel kənd məktəbində  sinif müəllimi işləyərək həmkəndlilərinin övladlarına qələm tutmağı, ”Ana” və “Vətən” sözlərini yazmağı öyrətdi. 1968-ci ildə qiyabi yolla  Azərbaycan Pedaqoji İnstitutunun Azərbaycan dili və ədəbiyyatı  fakültəsinə daxil olaraq 1974-cü ildə həmin fakültəni müvəffəqiyyətlə başa vurmuşdur. Əhəd Məmmədov 1968-ci ildən 1993-cu ildə Kəlbəcər rayonu işğal olunanadək Başlıbel kənd orta məktəbində Azərbaycan dili və ədəbiyyatı müəllimi işləmişdir. Kəlbəcər rayonu  erməni təcavüzkarları tərəfindən  işğal olunduqdan sonra məcburi köçkün kimi məskunlaşdığı Bərdə rayonunun Qarayusifli kəndində də məcburi köçkün uşaqların  təhsilə cəlb olunmasında fəallıq göstərmiş, onlara bilik verilməsi üçün əlindən gələni etmişdir. Məcburi köçkünlük həyatının bütün çətinliklərinə baxmayaraq vaxtı ilə Başlıbel kənd orta məktəbində uzun illər məktəb direktoru işləmiş Məhəmməd Şahbıəndəyevlə Əhəd müəllimin gərgin əməyi nəticəsində Qarayusifli kəndində Kəlbəcər rayon 46 saylı məktəbini yaratmış və burada  öz biliklərini məcburi köçkün şagirdlərə öyrətmişlər. Əhəd müəllim pedaqoji fəaliyyətlə məşğul olduğu dövrdə Baş müəllim və Ali Kateqoriyalı müəllim adlarına layiq görülmüşdür. Əhəd müəllim 1969-cu ildə ailə həyatı qurmuşdur, gözəl ailə başçısıdır. Dövlətimiz və cəmiyyətimiz üçün layiqli övladlar böyütmüşdür. Beş övladı, on iki nəvəsi, iki nəticəsi var. O, 2011-ci ildən təqaüddədir. Hal-hazırda Bərdə rayonunun Qarayusifli kəndində yaşayır. Doğma Kəlbəcərin düşmən tapdağından azad edilməsi Əhəd müəllimin sabaha inamını və ümidini daha da artırıb. Tezliklə doğulub boya-başa şatdığı doğma Başlıbel kəndinə qayıtmağı və ömrünün qalan hissəsini gənclik və uşaqlıq illərini keçirdiyi bu yerlərdə yaşamağı arzulayır. Biz də öz adımızdan əziz müəllimimizə can sağlığı və doğma Kəlbəcərimizdə doyunca yaşamağı arzulayırıq.

Oqtay SALAHLI
Dalidag.az