Aşıq Xalıqverdi Həmidoğlu doğma Kəlbəcərimizi həmişə respublika miqyasında ləyaqətlə təmsil etmiş, Azərbaycan aşıq sənətinə öz töhfələrini vermişlər. Aşıq Xalıqverdi Həmidoğlu ustad aşıq pilləsinədək yüksəlmişdir. O, bu yolda ustad aşıqlarımız olan Ağdabanlı Qurbandan, Dədə Şəmşirdən, Aşıq Mehdidən, Aşıq Hüseyndən, Aşıq Bəstidən bəhrələnmiş, onların irsini davam etdirmişdir. Dədə Şəmşirdən dərs almış, aşıqlığın sirrini ondan oyrənmişdi. Kəlbəcər toylarında dəfələrlə ustadı Aşıq Şəmşirlə bərabər iştirak etmiş, onun söylədiyi dastanları mənimsəmişdir. Axı, Kəlbəcər toyları dastansız keçmirdi. Əsasən ilin payız fəslində keçirilən Kəlbəcər toylardında aşıqlar axşamdan başladıqları dastanı dan yeri sökuləndə başa çatdırardılar. Aşıq Xalıqverdi dəfələrlə dastan söylədiyi toylarda həmişə xalqın böyük məhəbbətini qazanmışdı. Aşıq Xalıqverdi həm də yaradıcı aşıq idi. O, məclislərdə klassik Azərbaycan aşıq sənətinin incilərindən oxumaqla bərabər, həm də öz sözlərini də oxuyurdu. Yurd nisgili məcburi köçkünlük dövründə onun şeirlərinin ana xəttini təşkil edirdi: 

Ölərkən Kəlbəcər torpağında dəfn olunmaq onun arzusu idi. Lakin ömür vəfa etmədi. Gözü yolda, sözü yarımçıq qaldı ustadın... Aşıq Xalıqverdi ustad adını ustadları öyrənə-öyrənə qazandı. Məclislərdə iştirak edə-edə püxďtələşdi. Onu da qeyd etmək lazımdır ki, 1928-ci il oktyabrın 28-də doğma Kəlbəcərimizin Zivel kəndində anadan olan Aşıq Xalıqverdinin atası Aşıq Həmid də gözəl şeirlər yazırdı. Aşıq Həmid 1871-ci ildə Cavanşir qəzasının Kəlbəcər mahalının Çıraq kəndində anadan olmuş, sonralar Ziveldə yaşamış və Göyçəli Aşıq Alının məclislərində oxumuşdur. Səsi və saz çalması Aşıq Alını valeh etmişdir. Aşıq Alı ustadı Ağ Aşığın və özünün şeirləri yazılmış qalın qara cildli dəftəri ona bağışlamışdır. Sonralar Aşıq Həmidin oğlu Aşıq Xalıqverdi həmin dəftəri Kəlbəcərdə Əli Əmirova vermişdi. Əli Əmirov həmin dəftərdən Aşıq Alının şeirlərinin çoxunu ərəb əlifbasından kiril əlifbasına çevirmişdi. Əli Əmirovun qardaşı Sovet həkim həmin dəftərdəki qalan şeirləri kiril əlifbasına çevirmək üçün Bakı şəhərinə aparmış, qayıdanda yolda avtomobil qəzasına düşmüş və həlak olmuşdur. Nəticədə həmin qalın dəftər də itib - batmışdır. Aşıq Həmidin Aşıq Hüseyn Bozalqanlı ilə, Şahsəvənli Qara Çobanla deyişmələri olub. Aşıq Həmid şeirləri bədahətən deyirmiş. Belə bir ocaqda böyüən Xalıqverdi Həmidoğlu uşaqlıqdan saz-söz sənətinə bağlı olub. O, saza, sözə marağının olduğunu görüb gənc yaşlarında Dədə Şəmşirə şagirdliyə başlayıb və onun ilk şagirdi olub. Aşıq Şəmşir Xalıqverdi Həmidoğlunun aşıqlığını çox bəyənmiş, onu yüksək qiymətləndirmiş və ömrünün son illərində söhbət zamanı dəfələrlə deyib ki, məndən sonra Kəlbəcərin həm yaradıcı aşığı, həm də dastançı aşığı Aşıq Xalıqverdi olacaq. Aşıq Xalıqverdi Həmidoğlu da öz növbəsində ustadı Aşıq Şəmşiri yüksək qiymətləndirmiş, ona əlçatmaz bir zirvə kimi baxmış, onun şagirdi olduğu üçün fəxr edərmiş: